الأزمنة الثلاثة

والله طرى على بالي الموضوع قيل الفجر اقول ان شاء الله القى له عناوين بس على كل حال بسم الله
بعض الأشيا اللي كانت في زمن جدي وزمن الوالد ووقتنا الحين جدي يعني قبل 100 سنه هذا ماشفته انا
والوالد الله يحفضة يعني من 40 او 50 سنة
والعصر الحديث
اولاً نجي للزواج
جدي تزوج جدتي وعمرها 9 سنوات سوو العقد وشالوها بيته لا شافها ولا شافته ومشت الأمور
زمن الوالد من الولادة قالو هذي إلا هي الوالدة لكاظم من انولدت انحجزت لين كبروا وتزوجوا
واحداث صارت طويلة بذاك الوقت
وقتنا هذا لازم علاقة حب ومسن ورسايل شي يمشي حالة وشئ تعرفونه وصور ورسايل غرام
وبعدين ينتهون من بعض ولا زواج شك وطلاق وممكن يتوفقون إذا ماكانت علاقة قبل الزواج
راحت لمراحل زايدة بالتعارف هذا مو للكل انا اتكلم عن الشواذ وإلا فيه النضيف
الولادة
جدتي مرة راحت المزرعة وسقطت وجابت الولد لبوي كان اربعة شهور عمرة قالت للوالد
هذا اخوك وخذت قطعة قماش لفته ودفنته وبس ولا كنه شئ صاير
زمن الوالدة اذكر مرة قعدت عشرة ايام واللي تسقط عذابها شديد والله يساعد الحريم والله
هذا الوقت صاحبي زوجته ولدت وراحت بيت اهلها بتجلس 40 يوم وحالته صعبه صاير
عزابي وذا كلمته قال لاتزيد المواجع مسكين
زمن جدي الصحة
كان اللي يمرض او مولود بعاهة يموت وما يبقى إلا القوي عشان كذا كانت الأعمار توصل للـ90 وفوق
وهم بصحة
زمن الوالد صارت امراض وخاصة الجدري كان يقتل حتى ان حفار القبور كان يسكن المقبرة مايوقف
والحصبة والإلونزا كلهم يقتلون
وتقريباً مثل زمن جدي في بداياته لكن الأعمار صارت للستين وإذا زاد قليل من التلوث الحين والأكل
زمانا الحين الواحد يطلع من بطن امه فيه ثقب بالقلب ولا سكلسل ولا جي سكس بيدي ولا الموفيليا
المهم ينحط بالشيشة وحوسة ويعيش حياة بين المستشفى والبيت والله يرفق بالحال ومن التقدم
في الطب زادت هذه الحالات
في زمن جدي كانت المرأة تخيط ولا تطلع وكان البيت وتربية اولادها اساس حياتها وكان إذا طلعت
الوحدة تخاف حتى من الهوى لا يكشفها
زمن الوالدة بقت بعض الطبخات الشعبية الهريس العصيدة الرشوفة والعباة للحين على النضام القديم
يعني الوالدة الله يحفضها بين زمنين
الحين كل يوم يبون سوق وخذ من البلاوي بروح بيت صديقتية وبجي والحياة بين النت وبين النوم
زمن جدي كان الكتاب والحمير وسياكل سيارات كانت معدودة يعني بسيهات ذاك الوقت اللي عندهم سيارات
على ماسمعت اربع عوائل من اغنياء البلد
زمن الوالد جات السيارات والدبابات وتطورت السياكل وكثروا الناس وصارت ارامكوا والكل اشتغل
ودخلنا العصر الحديث الفاشل
الحين الواحد صار إذا ماعندة سيارة مايقوم يشتري كيس خبز ولا يفتح لا كتاب ولا حتى قران
وبلاك بيري ومسن ومغازل وخذ وجات الموديلات اللي مالها حدود والقصات شئ يضحك وشئ
يدمي القلب ماقول إلا يالله بالفرج والله الموضوع ماينتهي واخلي بعد كان فيه عضو عندة إضافة
الله يحيية هذا ولكم مني كل تقدير وشكر

شرايد الليل